‘Bi rêxistinbîyayîş aştî do mende bimano’ 

2025-07-31 10:48:57


	 

	MERSÎN - Fatoş Sarikaya derheqê prosesê aştîye de qisey kerd û va, tewrbîyayîşê cinîyan muhîm o û wina va: “Têkoşînê cinîyan do bi waştişê aştîye bisînor nêmano û eynî wextî de esasê têduştîya cinsîyê komelî de do şansê cuyêk alternatîf bidest bikero.”

	 

	Verfeka Komîsyonê Cinîyan ê Komeleya Heqê Merdiman (ÎHD) Fatoş Sarikaya derheqê prosesê awankerdişê aştîye û tesîrê têkoşînê cinîyan de qisey kerd.

	 

	‘Hema dewlete gamêke somut nêeşta’

	 

	Fatoş Sarikaya dîyar kerd ke 27ê Sibate û dima têgêrayîşê azadîya kurde, gamanê cidî û samîmî eşta û bi taybetî merasîmê veşnayîşê çekan ê PKK’yî xeylêk muhîm bî. Fatoş Sarikaya wina va: “Na game hetê nîşaneyê ke prosesî açarnaya dîyalog û demokratîkbîyayîşî de xeylêk muhîm a. La çi heyf dewlete hema nê hetî ra gamêke somut nêeşta.”

	 

	‘Ganî peynîya polîtîkayê înkar û îmhayî bêrê’

	 

	Fatoş Sarikaya va ke do bi eştişê gamê somutî, prosesê aştî ya negatîf, açaryo prosesê pozîtîfî û wina va: “Ganî tepişteyê nêweşî û sîyasî bêrê veradayîş. Ganî qeyûmî bêrê antiş. Ganî peynîya polîtîkayê înkar û îmha bêrê dayîş.”

	 

	‘Ganî cinî sey kerdox ca bigîrê’

	 

	Fatoş Sarikaya bale ant rolê cinîyan ê prosesî ser û va: “Têkoşînê cinîyan do bi waştişê aştîye sînor nêmanê û eynî demî de esasê têduştî cinsê komelî de do şansê cuyêke alternatîf bidest bikero. Bi rêxistina herêmî do aştîya mende zî pê bêro. Komelbîyayîşê aştîye bêvengbîyayîşê çekan û bêpirodayîşî sînor nîyo. Aştîya komelî esasê cuya têduştî de mumkin a.”