Dimayê 11 serran adetî dewam kenê

2025-07-01 10:18:07


	 

	Memîhan  Zeydan

	 

	BÊDLÎS - Verfeka Koordînasyonê Festîvale Adar Taş festîvala ke Tetwan de bîya adetêk û dimayê 11 serran reyke bîn yena organîzekerdiş û va, "Armancê ma oyo ke ma mîrasê ê wextî bigîrê û aver berê."

	 

	Festîvala ke Tetwan de bîya adetêk tewr peyîn serra 2013ine de amî organîzekerdiş. Adeto ke semedê tayînkerdişê qeyûman ê bi serran nêeşa dewam bikero, emser bi vurnayîşê îdareyê şaredarî ancî dewam bikero. Festîvala ke dimayê 11 serran sey adetêk yeno organîzekerdiş, bi sloganê "Ma bi hunera azad rayîrê aştîye akenê" reya 57ine ame organîzekerdiş.

	 

	Verfeka Koordînasyonê Festîvale Adar Taş erjnayîş festîvala ke dimayê serran amî kerdiş, kerd.

	 

	'Dimayê 11 serran caardiş merdimî hîsgêr keno’

	 

	Adar Taş, dîyar kerd ke na festîvale hîkayeyêke derg a û va, "Nêzdîyê 11 serrî yo ke ma sey DEM Partî nêeşkayîne na festîvale organîze bikerê. Reya peyîn ma serra 2013ine de organîze kerd. 10 serrê peyîn de vengîyêk virazîya. Bêşik, ê wextî ra xeylê çî vuryayî. Ma fam kerd ke wareyê kultur û hunerî de vengîyêk est o. Şarê Tetwanî zî wazenê festîvale pirr û bihêz organîze bikerê. Dimayê 11 serran organîzekerdişê nê cayî hîsgêrî yo. Armancê ma oyo ke ma mîrasê ê wextî bigîrê û biresnê û aver berê. Nê semedî ra, ma bi rastî berpirsiyarîyêk pîl girewto milê xo ser.”

	 

	'Aşmêke û nîmo ma amadekarî kenê'

	 

	Adar Taş kr qalê waştişê şarî yê semedê festîvale kerd û va, "Ma zî sey rêxistinê komelê sivîlî û heyetê îdareyî waşt ke ma na festîvale organîze bikerê. Ma aşmêke û nîm o amadekariyê festîvale ser o şuxilênê. Na çarçewa de ma waşt bi beşdarbîyayîşê bernameyê festîvale semedê edebîyat, sînema û muzîkî hetê ciwanan, cinîyan û xebatkarê kulturî ra bernameyêk dewlemend pêşkêş bikerê. Ma waştişê şarê Tatwanî verê çiman de girewt û ma wazenê ke xebatêke baş vejê werte.”

	 

	Adar Taş qetî kerd ke mesajê aştîye yê Rayberê Şarê Kurdî Abdullah Ocalanî semedê cinîyan zaf muhîm o û va: "Wexto ke ma xebata xo de sloganê xo yê bi rayîrê aştîye dîyar kenê, ganî ma, bi taybetî sey cinî, pêro wareyê ke ma ci de yê mesajê aştîye hişê xo de bigîrê û nê mesajî ser o vinderê."

	 

	Vengdayîş semedê tewrbîyayîşê festîvale 

	 

	Adar Taş venga ciwanan û cinîyan kerd ke bi girseyî beşdarê festîvale bibê û va, "Bêrê ma bêrê têhet û hêzê bidê yewbînan. Çîyo ke ma şarê Tetwanî wazenê oyo ke ê temamî festîvale de paştdayîş bidê ma, bêrê ma pîya rayîrê aştîye de rayîr ra şêrê.”