Kerdoxo ke desteştişê 12 tutan kerd, Antalya de zî eynî çî kerdo

2025-06-30 10:59:51


	 

	 

	Rojda Aydin-Dîlan Babat 

	 

	ŞIRNEX - Kerdox Yusuf Açar ke Şirnex de desteştişê 12 tutan kerd, vejîya werte ke Antalya de zî desteştişê tutêke kerdo. Derheqê kerdoxî de 9 serrî û 2 aşmî cezaya ke ameya dayîş, dosyaya ey zî îstînaf de ya.

	 

	10ê hezîrane de keso bi nameyê Yusuf Açar ke Şirnex de bi sûcê tecawuzê 4 tutan kerd, ame destbendkerdiş. Dimayê ke tutî çîyê ke cuyayê keyeyê xo rê qal kerdî, keyeyan derheqê kerdoxî de gerre kerdî. Kerdox dimayê ke ame destbendkerdiş 11ê hezîrane de hetê dadgehe ra bi sûcê “îstîsmarê cinsî yê tutan” ame tepiştiş. Kerdox ke heta nika hemverê 12 tutan de hêrişê cinsî kerd, ame dîyarkerdiş ke beno ke na hûmare zêde zî bibo.

	 

	Sewbîna goreyê agahîyê ke ma bi dest kerd, vejîya werte ke Yusuf Açar verê Antalya de ciwîyayo û 4ê êlule 2022ine de tecawuzê tutêke bîne zî kerdo. Derheqê kerdoxî de hetê 6ine Dadgeha Cezaya Giran ya Antalyayî ra 2yê teşrîna peyêne 2022ine de bi sûcê “Îstismarê cinsî yê tutan” û “Bêparverdayîşê azadîya kesan” îdîaname ame amadekerdiş.

	 

	Tute/î berdo keyeyê xo û desteştiş kerdo

	 

	Îîaname de derheqê hedîse de ca îfadeyê tutî/e zî ame dayîş. Îdîaname de ame vatiş ke Antalya de tut/e verê camî de bîyo/a û o wext kerdox nêzdîyê ey/aye bîyo û waştişê geyrî kerdo. Îdîaname de ca ame dayîş ke kerdox bi zor tutî/e berdo keye û deseştişê tutî/e kerdo. Pêwa îfadeyan zî kerdox sûcan red kerdo.

	 

	Dosya îstînaf de ya

	 

	Ame zanayîş ke derheqê kerdoxî de sûcê “Îstismarê cinsî yê tutan” 6 sal û 8 aşmî û sûcê “Bêparverdayîşê azadîya kesan” zî 2 serrî û 6 aşmî ceza ameya dayîş. Kerdox ke bêtepişte yeno muhakemekerdiş dosyaya ey îstîfan de yena vindarnayîş. Kerdox eynî wextî de dima ra keyeyê xo Antalya ra bar kerdo berdo Şirnex û tîya zî desteştişê 12 tutan kerd.

	 

	Siba: Keyeyo ke tutê înan desteştişî dir rî bi rî mend qalî kerd.