
Li Dortmundê panela ‘Jin, Aştî û Elewîtî’ hat lidarxistin


2026-11-08 18:03:17


	&nbsp;

	NAVENDA NÛÇEYAN- Bi pêşengiya Yekîtiya Jinên Elewî yên Demokratîk (YJAD) li bajarê Dortmund ê Almanyayê panela “Jin, Aştî û Elewîtî – Ji zimanên cuda ber bi siberojeke hevpar ve” destpê kir.

	&nbsp;

	Li Navenda Çanda Elewî ya Dortmund û Cevresi (DAKME) panel hate lidarxistin. Di panelê de rola jinan a di avakirina aştiyê de, bîra jinên Elewî û mijarên avakirina civaka demokratîk tên nirxandin. Bername bi taştê destpê kir. Di bernameyê de ji Ocaxa Agucan Dayika Dîdar bi Kurdî gulbang da. Beriya panelê Berdevka YJAD’ê Songul Morsumbul axivî.

	&nbsp;

	Songul Morsumbul bal kişand ser êşên jinên ku di şer û koçberiya zorê de xizmên xwe winda kirine û got, aştî ne tenê bidawîbûna şer e; di heman demê de tê wateya naskirina nasnameyan, azadiya baweriyan û mafên mirovan.

	&nbsp;

	Songul Morsumbul diyar kir ku bêyî bîr, ked û îradeya jinan aştî nabe û bal kişand ser Pêvajoya Aştî û Civaka Demokratîk. Songul Morsumbul got, “Bêyî azadiya jinan aştî kêm dimîne. Eger bîra me nebe, em nikarin siberoja xwe biafirînin.”

	&nbsp;

	Panel bi tevlîbûna jinên ji bawerî û civakên cuda dewam dike. Nurcan Guldu moderatoriya panelê kir. Di panelê de Gultan Kişanak, endama Meclîsa Jinên Êzidî Ayfer Ozdogan, nûnera jinên Ereb ên Elewî Revon Alî, nûnera jinên Yaresan û Endama Desteya Rêveberiya KJAR’ê Ruken Neqede wê semîner bidin.

	&nbsp;