Li Cizîrê komxebata têkoşîna li dijî tundiyê 

2026-11-15 15:42:52


	 

	ŞIRNEX - TJA'yê di çarçoveya çalakiyên 25'ê Mijdarê de li Cizîrê komxebatek ji bo jinan li dar xist. Di komxebatê de li ser cureyên tundûtûjiyê û têkoşîna jinan a li dijî tundûtûjiyê nîqaş hatin kirin.

	 

	Tevgera Jinên Azad (TJA) li navçeya Cîzîr a Şirnexê di çarçoveya çalakiyên 25'ê Mijdarê de komxebatek li dar xist. Komxebat li Taxa Sûrê hate lidarxistin û li ser tundiya li ser jinan û têkoşîna jinan a li dijî tundiyê nîqaş hate kirin. Gelek jinên taxê beşdarî komxebatê bûn.

	 

	Aktîvîsta TJA'yê Harika Peker di komxebatê de axivî û behsa dîroka 25'ê Mijdarê kir û got, "Şîdet ji zihniyeta serdestiya mêran tê. Civak hin rolan dide jinan, lê mafê biryardan an axaftinê nayê dayîn wan. Em nikarin bi tena serê xwe li kolanan bimeşin ji ber ku zihniyetek li dijî me heye. Di demên dawî de, hejmara xwekuştinên jinan pir zêde bûye. Dema ku em li van bûyeran dinêrin, gelek sedem hene ku jinan ber bi xwekuştinê ve dibin û mînaka herî berbiçav a vê yekê zihniyeta serdestiya mêran e. Lê heke em werin cem hev û li dijî pirsgirêkên ku em pê re rû bi rû dimînin bi hev re bisekinin, em dikarin bi hev re gelek pirsgirêkan derbas bikin. Dema ku em li tundûtûjiyê dinêrin, ne tenê tundûtûjiya fîzîkî ye, lê gelek celeb tundûtûjî li dijî jinan têne kirin. Mêr dixwazin vê têkoşîna li dijî tundûtûjiyê bi dawî bikin."

	 

	Piştî axaftinê, komxebat bi nîqaşan berdewam kir.

	 

	Komxebat bi dirûşmeya "Jin, jiyan, azadî" bi dawî bû.