'Komxebata ronesansê dê bibe bersiva herî mezin û bihêz' 2025-08-30 09:53:42     Stêra Can    ŞENGAL - Jinên Êzidî ku tev li komxebata ronesansê bûn, diyar kirin ku ji bo wan kesên ku jin bê hêz didin xuyakirin û bê qîmet dibînin bersiva herî mezin û bihêz e ev komxebat û gotin ku dê heta dawiyê bi banga aştî û civaka azad re ne      Jinên êzidî ku ev 11 sal in ji her alî ve xwe bi rêxistin dikin û li dijî her cure êrîşan li ber xwe didin, di 28’ê Tebaxê de li Şengalê bi pêşengtiya Tevgera Azadiya Jinên Êzidî (TAJÊ) bi dirûşma ‘Bi rêxistin û têkoşînê em ê bibin pêşengên civaka demokratîk û azad’ Komxebata Ronesansa Jinên Êzidî pêk anîn. Di komxebatê de jinên êzidî mijarên wek pirsgirêkên zîhniyetê, zayendperestî, kuştin û xwekuştina jinan, bandora fermanê ya li ser jinan, piştî fermanê rewşa jinan, xweparastin û di pêkanîna ronesansê de roja jinan, niqaş kirin û çareserî pêş xistin.    Jinên ku tev li komxebatê bûn derbarê komxebat û rola jinan a ronesansê de fikrên xwe bi ajansa me re parve kirin.     Ronesans dê bibe azadiya hemû kesên bindest    Endama Meclisa Xweser a Zoravayê Neam Şeref destnîşan kir ku dê bi komxebatê re xwe hîn zêdetir birêxistin bikin, ji ronesansê re pêşengtiyê bikin û wiha got. “Ev komxebat ji bo ku em xwe rêxistin bikin, her wiha bibin bersiva fermanan gelek girîng e. Bi tayêbetî wek jin em ê xwe li ser vê fikir û felsefeya zêrîn ê Serok Apo perwede bikin û bigihin hemû mafên xwe. Komxebat ji bo Ronesasa jinên Êzidî û civakek azad hat lidarxistin. Nameya Serok Apo ku di dîrokên cuda de ji civak û jinên êzidî re şandibû wek sînevîzyon hat guhdarkirin û temaşekirin. Em bi peyamên Serok Apo ya ji bo me gelek kêfxweş bûn. Em ê bi vê komxebatê xwe pêş bixin û birêxistin bikin. Weke ku Serokatî dibêje Ronesas wê bibe azadiya hemû kesên bindest.”     ‘Heta dawiyê em bi banga aştî û civaka azad re ne’    Endama Akademiya Jineolojiyê ya Şengalê Sara Botan jî bi kurtasî ev nirxandin kir: “Em vê komxebatê li mîmarê Azadiyê Rêber Apo her wiha li hemû jinên jîhanê pîroz dikim. Bi amadebûna bi dehan jinan ev komxebat birêve çû. Cara yekemîn e di dîroka Êzdatiyê de jinên Êzidî êş û azarên kişandine her wiha fermanên ku jiyane bi hevre li ser gelek mijaran nîqaş dikin û pirsgirêkên xwe tînin ziman. Ji bo wan kesên ku jin bê hêz didin xuyakirin û bê qîmet dibînin bersiva herî mezin û bihêz e ev komxebat.  Di vê komxebatê de semîner hatin, armanca me ew e ku em ê çawa pêşengtiya Ronesasa civaka Êzidî bikin. Emê çawa xwedî li banga aşîtî û civaka demokratîk derkevin. Beriya femanê jinên Êzidî cihê xwe di nav civakê de gelek kêm bû û biçûk dihat dîtin lê piştî fermana 3’yê Tebaxa 2014’an, jinên êzidî xwe li ser fikir û felsefeya Serok Apo xwe birêxistin û perwerde kir. Her wiha cara yekem di dîroka Êzdatiyê de hêzek weke YJŞ, Asayîşa Êzidxanê her wiha Tevgera Azadiya Jinên Êzidî TAJÊ hatine avakirin. Meclis û saziyên li Şengalê hemû jî jin pêşengiya wan dike. Ji bo ku em bikaribin bibin bersiva 74 fermana em komxebatên bi vî şeklî lidar dixin ka çawa em bûn mînak ji bo her jinekê. Em heta dawiyê bi banga aştî û civaka demokratîk re ne.”