Derya Ren

 

MERKEZÊ XEBERAN - Çalakîkere Zulfan Xerîb Rehîm dîyar kerd ke dimayê weçînayîşê Başûrî ra dima hema hukmat nêameyo ronayîş û va: "Parlamento nêeşkeno bi tesîr bixebitîyo. Lazim o PDK û YNK yewbînî bibê û stratejîyêk aver berê. Yewbîyayîş do tesîrêko pozîtîf pêro parçeyanê komelî ser o bikero."

 

Weçînitişanê parlamentoyî yê 20ê teşrîna verêne 2024 de, Herêma Kurdîstanî de rêjeya beşdarbîyayîşê vengdayoxan %76 bîye. Goreyê netîceyanê weçînitişî, PDK Hewlêr û Duhokî de bi ser kewtî, Silêmanî û Helepçe de zî YNK tewr zêde veng girewt. Tevgera Nesilê Neweyî her çar herêman de sey partîya hirêyine vejîya.

 

Labelê nêzdîyê yew serrî ra dima, hema hukmat nêameyo ronayene. No nêronayîşê hukmat kaos û krîzan zêde kerdo.

 

Aktîvîste Zulfan Xerîb Rahim, derheqê babete de JINNEWS’î rê qisey kerd. 

 

‘Parlamento nêeşkena bi tesîr bixebityo’

 

Zulfan Xerîb Rahim, derheqê averşîyayîşê Rojhelatê Mîyanên de, va: "Her averşîyayîşêk Iraqî tesîrêk muhîm temamê Rojhelatê Mîyanên, pêwa beşê bînî yê Kurdistanê zî keno. Iraq herêmêk zafreng o. Nê semedî ra na herême berpirsiyarîyêk taybetî semedê Kurdistanî wedarnena. Her çiqas serrêke weçînayîşan ser o derbaz bî zî hukmat nêameyo awankerdiş û parlamento nêeşkena bi tesîr bixebitîyo. Sewbîna xizmetguzariyî de hîn astengî zî est ê."

 

'YNK û PDK ganî yewbînî bibê'

 

Zulfan Xerîb Rehîm va: “Eke yewîye bibo, ê do parlemento de tewr xurt bibê. Hêzê kurdan Başûrê Kurdîstanî de do parçeyanê bînan ê welat xurtkerdişî de zî biba alîkar. Coka hewcedarîya yewbîyayîşî esta, ganî her kes rolê xo biciwîyo. Lazim o ke YNK û PDK bibê yew û stratejîyêk aver berê. Yewîye do tesîrêk pozîtîf serê pêro beşê komelî bikero.”

 

‘Do Rojhelatê Mîyanên eleqedar bikero’

 

Zulfan Xerib Rahim, dîyar kerd ke do averşîyayîş tesîrê xo her cayî ser o bikero û va: "Lazim o ke rayapêroyî û siyasetmedarî hemverê rewşa bîyaye bibê yew. Her averşîyayîşêk tena tesîr Başûr û Iraqî nêkeno, la eynî wextî de temamê Rojhelatê Mîyanên zî keno. Ez hêvî kena ke her averşîyayîşêk Başûrî do feyde bido şarê kurdî. Şarê kurdî ke bi hezaran serran o ameyo înkarkerdiş do bi statuyê xo biciwîyo.”