Elfazî Toral

 

STENBOL - Cinîyan waştişê xo yê aştîyêka merdimayîye ardî ziwanî û vatî: "Rayberê ma hema Îmralî de yo, seba prosesê aştîye tu hêvîya ma çin a" û vatî, seba serkewtiş ganî dewlete gamanê lazimî bierzo

 

Dimayê "Vengdayîşê semedê Aştî û Komelê Demokratîk" ê Rayberê Şarê Kurdî Abdullah Ocalanî yê 27ê Sibate ke waştişê çareserîyêk aştîyane û demokratîk ê meseleya kurdî kerd, Prosesê Aştî û Komelê Demokratîkî dest pêkerd. Bi destpêkerdişê nê prosesî, hem şarê bindestî û yê Tirkîya û hem zî şarê Rojhelatê Mşyanên proses ko kerdê û her wareyî de hewldayîş est o. Bi taybetî derheqê çareserkerdişê nê meseleyan de waştiş û hêvîyê cinîyan zêde yê. Cinî JINNEWS’î rê prosesê Aştî û Komelê Demokratîkî ser o qisey kerdî.

 

'Ma wazenê Rayberê ma bêro parlamentoyî'

 

Guler Yilmaze va: "Destpêk ra ma tim aştî waşta û ma do dewam bikerê. Aştî tim waştişê dayîkan bîya. Ma nêwazenê tutê tu kesî bêro kiştiş. Hêvîyê ma prosesî ra no yo ke êdî tutî meyerê kiştiş, êdî dayîkî mêbermê û dayîkanê leşkeran û gerîlayan destê xo bidê yewbînî ke no proses awan bikerê. Proses seke ma hêvî kerdêne aver nêşîyo. Ma kurdî tim rastê zulmî ameyê. Pêwa zulmî ma hema vengdayîşê aştîye kenê. Ma wazenê Rayberê ma bêro parlamentoyî. Prosesê aştîye dest pêkerd, PKKyî çekê xo veşna û ma wazenê dewlete gaman bierzo. Dayîkê Aştîye şî parlemento û qiseykerdişê kurdkî înan rê qedexe kerdî. Nê dayîkî bi serran o têkoşîn danê. Demêk ke ziwanê ma yê dayîke qedexe yo û Rayberê ma hema zî Îmrali de yo. Semedê prosesê aştîye tu hêvîya ma nêmenda. Na rewşe de, ma hewceyê Rayberê xo, gerîlayanê xo û awankerdişê aştîye yê. La dewlete ra hêvîya ma nêmenda.”

 

'Waştişêka merdimayî ya'

 

Demet Gumuş va, şer tesîrêko kûr her kesî ser o kerdo, hem hetê madî hem zî hetê manewî ra: "Ma, şarê kurdî, bi serran o wareyê şerî de yê. Ma tim terefgirê aştîye yê. Ma êdî nêwazenê cenazeyê leşkeran yan gerîlayan bivînê. Ma aştîye wazenê ke tutê ma cuyêka baş biciwîyê. Waştişê ma yê aştîye, waştişêk merdimayîye yo. Ma qet têduştî nêdîya, ne dibistanan de û ne zî teber ra.”

 

'Abdullah Ocalan sermuzakereker o'

 

Endama Koordînasyona Meclîsê Cinîyan a DEM Partî Besrîye Tekgur vatişê Devlet Bahçelîyî ardî xo vîr ke vato "Wa bêro parlamentoyî de qisey bikero." Besîre Tekgur va: "Bi destpêkerdişê nê prosesî, heyetêk şî Îmralî û Bîrêz Abdullah Ocalanî reyde ame têhet. Ocalan vengdayîşêk kerd. Na vengdayîş seba pêro şaran averşîyayîşêka muhîme bîye. Çike Ocalan seba pêro şaranê bindestan Vengdayîşê Aştî û Komelê Demokratîke kerd. Beno ke dewlete perspektîfê xo dayîşûgirewtişî bikero, la hem hetê dewlete ra û hem zî hetê şarî ra ameyo qebûlkerdiş ke Birêz Abdullah Ocalan nê prosesî de sermuzakerekar o. Nê semedî ra ma xeylêk rey vato ke no dayîşûgirewtiş Abdullah Ocalanî dir bêro kerdiş.”

 

Berpirsiyarî milê her kesî ser o ya'  

 

Besriye Tekgur dîyar kerd ke her beşêk komelî  berpirsîyarîya serkewtişê Prosesê Aştî û Komelê Demokratîkî gêno xo ser û va: “Komîsyonêk parlamento de ame ronayene û no muhîm o, labelê, ma vînenê ke dewlete hema gamî nêeştî ke na mesele bîyaro vernîya raya pêroyîne. Zaf muhîm o ke hem komîsyon, hem partîyê sîyasî hem zî hikûmet na mesele de xesastir bibê. Komîsyon ganî rolê xo kay bikero. No proses semedê pêro şaran o. Tena rayîrêk est o ke çekî bêveng bimanê û hawîrdorek aştîye bêro awankerdiş. Ganî pêro şar pîya awan bikerê. No  berpirsiyarîyêk pîl ê kesano ke Tirkîya pîya îdare bikerê.”