Rozerîn Gultekîn

 

STENBOL - Cinîya bi nameyê Bahar Aksu hetê Rustem Elîbol û hîrê hevalanê ey ra amî qetilkerdiş. Cinîyan semedê Bahar Aksu vengê xo berz kerdî û vatî: “Nê merdimî 5-6 serrî yo mîyanê ma de yê. Ganî nê merdimî zîndan ra nêvejîyê. Yewine polîtîka semedê cinîyan vejenê no yo; ma do senî tutan bîyarê dinya, senî bizewicnê. La ma hemverê nê zî înan ra vanê ke semedo ke cinî nêrê qetilkerdiş çi kenê.”

 

Goreyê dayeyê ajansê ma aşma nîsane de 34 cinî û 3 tutî ameyî qetilkerdiş; 14 cinî û 2 tutî zî bi şik dinyaya xo bedelnayî. Qezaya Şîşlî ya Stenbolî Bahar Aksu hetê Rustem Elîbol yê fek ci ra vera dabi û hîrê hevalê ey ra amî qetilkerdiş. Cinîyan semedê Bahar Aksu kuçeyan de çalakîya pê anê dîyar kerdî ke do têkoşînê edaletî yê Bahar Aksu dewam bikerê.

 

Hunermend Nur Surer da zanayîş ke polîtîkayê ke cinîyan pawenê nînê averşîyayîş û sîstemo bîyaye cesaret dano şikdaran. Nur Surer wina va: “Şikdarî bi rehetî mîyanê ma de gêrenê. Yê Bahare qetil kerdî 4 kes bî. Qeydê sûcî yê hemîne est o. Nimûne; yew heskerdoxa xo kişeno, 26 qeydê sabiqeyê ey est o. Merdimêk 26 sûc kerdo, badê ke cinîyêke kişeno yeno tepiştiş. Xeylê kesî 5-6 serrî yo mîyanê ma de gêrenê. Ganî nê kesî zîndan ra nêvejîyê. O camêrdo ke tutê xo qetil kerdibî, ganî zîndan ra nêvejîyayîne. Semedê zîndanan veng bikerê, înan vera danê. Rojnamegeran, wendekaran avûkatan gênê.”

 

‘Ma biendîşeyîn ê’

 

Endama Platformê Ma do Kiştişê Cinîyan Vindarnê (KCDP) Feyzanur Yilmaz zî dîyar kerd ke her roje cinîyêke yena qetilkerdiş û va do semedê Bahar û cinîyê ke ameyê qetilkerdiş têkoşînê edaletî dewam bikerê. Feyzanur Yilmaz wina va: “Camêrdo ke bêters Bahare qetil kerd, cesaret îqtîdarî ra gêno. Yê ke kiştoxan vera danê, verpersyarê cînayetan ê. Wa tu cinî bêhêvî nêmano. Ma do bi têkoşînê rêxistinkerde vernîya nê bigîrê. Wa her kes tewrê têkoşînê rêxistinkerde bo. Wa fek heqê xo ra vera nêdê.”